As tuisonderwys vir u nuut is, en u daarmee wil begin, hier is 5 maklike stappe hoe om te begin:

1) As u kind in ’n skool is, haal die kind uit die skool. Die wet vereis nie dat ouers enige papierwerk aan die skool verskaf nie. Dit word egter aanbeveel om hoflikheidhalwe die skool in te lig dat u besluit het om u kind tuisonderrig te gee, en te vra vir 'n oorplasingssertifikaat. As u nie die sertifikaat ontvang nie, moet egter nie bekommerd wees nie.

2) Die SA Skolewet vereis dat ouers hulle kinders moet registreer vir onderwys tuis. Die praktyk is egter dat meeste provinsiale onderwysdepartemente nie die  administratiewe vermoëns het om kinders te registreer vir tuisonderwys nie. Sommige van die groter provinsies het ’n beperkte administratiewe vermoë om wel tuisleerders te registreer. Ongelukkig het die amptenare in daardie departemente beperkte insig in tuisonderwys en die wetlike voorskrifte oor tuisonderwys. As gevolg hiervan vra hierdie amptenare dat ouers aan allerhande vereistes moet voldoen wat nie deur die wet voorgeskryf word nie, voordat hulle kan registreer vir tuisonderwys. As gevolg van hierdie situasie is meer as 90% van tuisskool gesinne nie geregistreer by die Departement van Onderwys nie. Ouers word aanbeveel om die dokument “Regsoorwegings in Tuisonderwys” te lees op die webwerf van die Vereniging vir Tuisonderwys (kies die “Legal” oortjie) te lees en die Pestalozzi Trust te skakel.

3) Word ingelig oor tuisonderrig. ’n Goeie beginpunt is die Beginnergids op die webwerf van die Vereniging vir Tuisonderwys. Besoek www.tuisskolers.org, kies die “Getting Started” oortjie op die spyskaart en kliek op “Beginner Gids”. (U moet by die webwerf aansluit om toegang te kry) Woon werkswinkels oor tuisonderwys by. Hou die "Events" bladsy van die webwerf dop vir advertensies vir werkswinkels.

4) Kies ’n tuisonderwys benadering en ’n kurrikulum wat die behoeftes van u en u kinders aanspreek. Besonderhede van kurrikulums kan gevind word op die webwerf van die Vereniging vir Tuisonderwys onder die “Curriculums” oortjie. U kan ook 'n kurrikulum uitstalling bywoon. Besonderhede oor uitstallings kan gevind word onder die “Events” oortjie op die die webwerf.

5) Sluit aan by tuisonderwys ondersteunings- en –besprekingsgroepe en praat met ander tuisskoolouers. Besonderhede oor sulke groepe kan gevind word onder die “Support” opsie op die die webwerf.

• Prev
• Next